Humsafar

Kota me ek meeting thi meri. Achanak hi mjhe ek din boss ka phone call aya aur unhone bola "arre bhai state level ki meeting hai.. tmko to jana hi padega".. Ab biwi ko smjhana thoda mushkil hogya ke jana zaruri hai. Gussa thi phir bhi usne do bundle parathe ke baandh kar hi dum liya, boli "wahan itne log honge, akele thodi na kha payenge aap". Khair main do ghante ke safar k liye 15 parathe aur bahut saari daant ghar se lekar chala. Itni jaldi AC me reservation to milna namumkin tha to sleeper mein kisi tarha current booking me chadhgya. Koi khaas samaan to nahi tha mere paas par ek zaruri kaaghzaat ka briefcase aur ek khane wala bag tha. Mujhe side lower ki seat mili thi to saman apni seat k neeche hi rakhkar aram se baith gya. Mere samne ki seat par koi na tha, to mujhe laga ke thodi der me shayed koi ajaye. Din ka waqt tha to bethkar hi jana tha. Khidki ke bahar haseen haryali dekhta hua ja rha tha jo pichhle kuch dino ki barish ne kardi thi. Raste me bahut se bachcho ne mere jaise khidki ki taraf bethe hue logo ko dekhkar 'bye bye' ki pukaar b lagayi. Kuch adhe ghante baad jb maine wapas andar nazrein ki to dekha k mere samne ek chhota sa bachcha yehi koi 7-8 saal ka, maile kuchaile se kapde pehne mujhe hi taktaki baandhkar dekh raha hai. Main acachanak se conscious hogya aur maine besaakhta neeche rakhe hue samaan ko check kiya. Aisa karte hi mujhe sharmindagi bhi hui par mujhe dekhkar us bachche ne bhi neeche dekha fauran. Phr uske baad har 10 minute pe wo bachcha seat ke neeche dekhta. Mujhe vehshat hone lagi ke kahin chor to nahi? Uske maa baap bhi kahin dikhayi nahi derhe the. Pata nhi kahan se agaya. Aajkal to aise bachche train kiye jaate hain chori ke liye. Upar se bag me rakhe paratho ki fikr b mjhe khaayi ja hi thi. Agar wohi lejaye to mere pet ka achha khasa nuqsan hojata. Yehi sochte sochte Kota ke ekdm nazdeek jab agye tab us bachche ne phir se neeche dekha. Is baar maine bina jhijke apna bag aur briefcase bahar nikalkar apne side me rakhliya. Mujhe apni jeet par bada faqr mehsus horha tha. Dus minute baad jab Kota Sheher agaya tab kahin se ek maile se kapde pehne aurat mere barabar se nikalkar aayi aur us bachche se boli "chal aja... agaya Kota". Us bachche ke chehre pe ek ajeeb si chamak agyi. Usne fauran jhuk kar seat ke neeche se do nanhi nanhi chamakti hui gulabi chappalein nikali aur unko pehenkar apni maa ke peechhe peechhe bhaaga. Aur main apna briefcase aur bag hath me liye 5 minute tak us ruki hui train me apni jaha par khada raha.